Багануурын нүүрс 1 шуудай нь 3500 төгрөгийн үнэтэй байна

Нийслэл хотод ихэвчлэн Налайх, Багануурын нүүрс худалдаалдаг. Багануурын нүүрсний хувьд 1 шуудай нь 3500 төгрөгөөр борлуулагдаж байна. Харин нэг портер машин нүүрс 170 мянган төгрөгөөр иргэдэд хүрч байна.

Худалдаачдын хувьд борлуулалт өмнөх жилүүдийнхээс харьцангуй буурсан гэлээ. Шуудай нүүрс, шуудай мод 3500 төгрөгөөр худалдаалж байгааа бөгөөд мод бөөнөөр нь авбал нэг шуудайг нь 2500 төгрөгөөр тохирч зардаг гэв. Түүнээс гадна жижиглэнгээр худалдаалах газар олдохгүй байгаа нь хүндрэлтэй байна, газар өгөхгүй байна гэсэн шүүмжлэлийг тэд хэлж байна.

Иргэдийн хувьд дунджаар нэг өвөлдөө 2-3 тэвш нүүрс хэрэглэдэг. Гэхдээ сүүлийн жилүүдэд нүүрсний үнэ өсч байгаа ч чанар болоод хэмжээний хувьд муудаж байна гэсэн тайлбарыг иргэд өглөө. Ихэнх иргэн Багануурын нүүрс авдаг. Багануурын нүүрс нэг портер нь дунджаар 170 мянган төгрөг аж. Налайхын нүүрсний хувьд чанарын хувьд харьцангуй сайн ч үнэ өртөг нь өндөр учраас хэрэглэх боломжгүй гэж байна.

Борлуулалт буурсныг нүүрс, модны үнэтэй холбон ойлгож болно. Мөн шахмал түлш худалдаанд гарч байгаа болон шөнийн цахилгааны тарифыг тэглэсэн нь ч бас нөлөөлснийг үгүйсгэхгүй юм.